GPC thurel Speaker-in a sawifiah

Assembly Speaker Lalbiakzama chuan vawiin (8.9.2025)-a a office-a press conference a neihnaah 'General Purpose Committee (GPC) thurel tawh Council of Ministers-in tihdanglam a ni ngai lo' tia sawi awm chungchang a sawifiah.

Lalbiakzama chuan MNF ministry kalta a GPC meeting March 4, 2020-in Mizoram Legislative Assembly (Grants of Loans and Advances to Members) Rules, 2000-a Sub-rule (d) of Rule 4 delete tura a rel chu Council of Ministers meeting July 12, 2020 in a pawm lo tawh tih sawiin, 'MLA-te housing loan installment-a pek chhuah thin tihbo a, tum khata lak theih dan tura rawtna a ni. Hei hi Cabinet meeting khan tipuitling lo in “The Mizoram Gazette” No. H.12019/1/2020-PAD, dt.26thAugust, 2021 chhuakah chuan Sub-rule (d) of Rule 4 chu omit/delete a ni ta lo a ni,' a ti.

Tun tuma GPC thurel tawh Council of Ministers in a defer kha MLA-te travelling allowance cheng nuai 2 ni ṭhin cheng nuai 3 Lakh a tihpun chungchang a nih thu sawiin, 'GPC-ah khan hnial pawlte pawh an awm tho mai. Mah se, committee-ah chuan a tam zawk ngaihdan anga kalpui thin a nih avangin pass kha a ni ta,' tiin Cabinet meeting-in 'kan sum dinhmunte a duhawm lutuk rih loh lai a ni a, mahni leh mahni hamthatna lam hi chu i hmanhmawh lo rih ila, kan sum dinhmunte en chungin kan la ngaihtuah tha leh dawn nia' tia an rel thu a tarlang.