Mizo Talent-ah judge an tha dawn

Zai mi, lâm thiam, rimawi tum thiam, magician leh acrobatic lama tuite inpho chhuahna tur, ‘Mizo Talent’-a judge pali awm tur zingah hian Mizoin comedian kan neih that H Rotluanga (Mapuia Hauhnar) bakah hian Youth Icon judge pahnih, Victor Vanlalhruaia leh Rosy K. Remsangpuii te leh lâm thiam leh lâm intihsiaknaa endiktu lo ni fo tawh Nutei Pautu an tel dawn.

Kan hriat angin H.Rotluanga hi Mizorama TV Reality Show, Comedian Search hlawhtlinpui em emtu a ni a, Mizo comedian tam tak chher chhuak tawh niin Zephyr Drama Club-a an hotupa a ni.YouTube-ah FTH Official tih channel neiin show leh ennawn hlawhtling tak takin a kalpui mek. Mizo Talent-a judge-a thu turte hi an theihna huanga mi hriat hlawh tak tak an ni a, show pawh tihmuhnawm tham ni theuh tura ngaih an ni.

Victor-a leh Rosy-i te hi Youth Icon 2024-ah khan an comment ngaihnawm tak tak hriat tawh niin Youth Icon boruak a len chhan zingah an a tel tih ngam a ni a. Nutei hi Mizote zinga lâm lama sulhnu nei tha tak a ni a, Mapuia hi ram puma an ngaihven rawn tlinga Comedian Search chhuah thei a ni.

Mizo Talent hi August 5, 2025-ah tan a ni dawn a, entry form a lak theih mek a, July 26 hmaa thehluh theih a ni a. LPS Office, Zarkawtah hardcopy-in a lak theih bakah LPS Official Facebook page-ah PDF download tur a awm bawk.

Mizo Talent-ah hian zai mite tan a tel theih a, mal zai emaw, zaipawl emaw, a huho (group/band) ang pawhin a tel theih. Lâmah pawh mi mala tel duh tan kawng a inhawn bakah a huhoa lâm duh tan pawh intihsiak a hmachhawn theih. Rimawi hmanraw chi hrang hrang tum thiamte tan a tel theih a; category dang, magic leh acrobatic pawh a awm.

Mizo Talent-ah hian pakhatnain Rs. 2,00,000 a dawng ang a, top 3 zinga mi pahnihin Rs. 50,000 ve ve an dawng ang a, top 10-a inhlang kai, top 3 ni pha ta lo mi pasarihte pawhin Rs. 10,000 theuh an hlawh dawn a ni.