Mizo Idol tan a ni dawn ta

Mizo Idol Season 8-naa tel tumte tan naktuk (15.8.2025) atangin mobile phone number - 9436140012-ah Telegram hmangin an zai lai vedio theh luh tan theih a ni.

Zonet buatsaih Mizo Idol Season 8-na chu naktuk atanga tan a ni dawn ta a, Mizo Idol-a tel tumte tan application form lak chhuah ngai loin, virtual audition neih tur a ni a, tun thla tawp, August ni 31 thleng mahni zai lai video hi theh luh theih a ni ang.

Mizo Idol thlanaah hian kum 15 atanga kum 30 inkar, Mizo hla sa thei tawh phawt chu a duh apiang tel theih a ni. Virtual audition-a mahni zai lai video theh luh turah hian Mizo hla chang khat leh a thunawn, a hânga sak tur a ni a, vawi khat record-ah a tluana sak tur a ni. 

Hla record nan hian mobile phone camera hman tur a ni a, a tluana record tur a ni. Video leh audio khawih danglam, edit phal a ni lo a, video quality chu a tha thei ang bera record tur a ni a, a theih hram chuan audio fiah tha, a background-a thil dang lang lo leh room eng tha te ngaihpawimawh tur. A remchang a nih chuan tripod emaw mobile stand emaw hman tur a ni.

Video theh lut tur chuan an zai tan hmain an hming, veng leh khua an sawi hmasa tur a ni a; video rualin an nihna tichiang turin Aadhar card emaw voters ID emaw driving license emaw thawn tel tur a ni. India khua leh tui ni lo tan pawh Mizo Idol-ah hian a tel theih a, an kum zat tihchianna ID an neih a ngai thung.