CM thusawi sawi mam sakah Speaker puh

MNF chuan thuchhuah siamin, Forest Conservation Amendment Act (FCCA), 2023 Mizorama hmang ve tura ZPM Sorkarin resolution a putluh Assembly-in a pass tak thu kal zelah Assembly Speaker Lalbiakzama'n press conference koin, Chief Minister-in dawt chiang tak a sawi, sawi mam sak a tum tih tarlangin, Lalbiakzama chet dan kha Speaker dinhmun hmansualna nasa tak a nih avangin mipuite hnenah ngaihdam dil turin an phut.

Lalbiakzama chuan speaker dinhmun lo chelh tawh thinten political party office-ah pawh an sawi ngai loh, ruling party ṭanna sawhngheh tumin, House chhunga rorelna kalpui dan chu langsar taka ṭan lam neiin a sawi chhuak chiam nia tarlangin MNF chuan, 'Assembly House chhung leh pawnah pawh thulai latu tur, ṭan lam ti lang lo tur leh House member zawng zawngte zahawmna venghimtu tur berin press mite hmaah meuh politics-a ṭan lam nei rana thu a sawi duh ta mai hi thil mak tak a ni,' an ti.

MNF chuan  House chhunga Chief Minister-in chawp leh chilha dawt chiang tak a sawi, a hnua hailana lo awm leh ta sawimawi pui a tum dante enin, Chief Minister ber hian press conference nei tur hian Speaker hi 'a lalna kha tak hmachhuanin a nawrlui em ni?' tih zawhna a piang nghal tih sawiin, 'Speaker hian ama thu ngeia press conference-a a thusawite hi a sawi a nih phei chuan nihna hman sualna leh Speaker zahawmna venhim zawh lohna nasa tak anih avangin speaker atanga inhnukdawk ngam ngei turah kan ngai,' tiin Speaker chu constitution hnuaiah pawh sorkar laiin duh duha a thunun theih lohna turin venhimna fel tak pek an nih thu a sawi.

MNF tarlan danin, MNF Sawrkar liamtaah khan Mizoram Assembly chuan FCAA 2023 dodalna resolution a pass a, a nih dan tur anga bawhzuiin, Assembly Commissioner hmingin Secretary General, Lok Sabha hnenah thlen a ni. Mizoram Chief Secretary pawhin bawhzuiin file-te pawh a nih dan tur angin a kal a, MLA inthlanpuiin a nang zui ta a ni. MNF Sorkarin FCAA 2023 dodalna resolution a lo pass tawh kha ZPM Sorkar lo ding ta hian a pawm zui ve mai tur a nih laiin, India ram venhimna kaihhnawiha sum hnuh luh theih  an inbeisei vang chauhin, a hmaa nasa taka an dodal FCAA 2023 chu Mizorama hman ve an duh leh ta thut.