Maria CT Zuali thlavang hauh

Mizoram IAS Association chuan Maria CT Zuali, IAS (SCS:2014) Director, Commerce and Industry hna atanga sawn chhuah a nih chungchangah a hnuaia tarlan ang hian Chief Minister leh Minister-te hnenah memorandum an thawn.

IAS-te memorandum :

1. Kan hriat angin Ms. Maria CT Zuali IAS chu Director of Commerce and Industry chu he Departmenta kum khat (24.6.2024 atangin) a awm chauh tihin ama thawhpuite ngei intelkhawmin  hêka sawn chhuah an phut avangin ni 1.9.2025 khan Sawrkar chuan Special Secretary, Department of Fisheries ni turin a sawn chhuak a. Ni rei lo te hnu 4.9.2025-ah Secretary, Horticulture Department chelh  turin sawn leh a ni a. An hêkna hi a dik nge dik lo tih lam aiin heti teh phuta  a mi chhawr te ngeiin vau titiha Sawrkar an nawr avanga Ms. Maria CT Zuali hi sawn chhuah niin a lang a. Thil mak tak a ni.

2. He thil hi Mizoram I.A.S. Association chuan ngun takin a thlir a. A hnuaia thawkten an hêkna hi thudik behchhan a ni nge ni lo tih enfiahna (enquiry) lak pawh awm lo va, hetianga senior officer lak chhuah hi hun lo kal zel atan thil tha niin kan hre lo va. He thil avang hian hun lo kal leh zel turah pawh eng department pawhin an hotu ber te hi  nek  chhuah tuma hekin,  chu an hêkna chu a dik leh dik loh pawh finfiah lova  senior officer te tuartir zel hi thil awm thei a la ni chho ngei ang tih a hlauthawnawm hle  a ni.

3.  Sawrkar hian IAS transfers and postings rules hi fel takin a neih a rinawm a. Chung dan palzuta a hnuaia thawktuten senior office la chhuak tura Sawrkar an nawr hlawhtling thei hi ram danga thil thleng vang tak niin kan hre bawk. Social media kan hmuh thenkhat anga Ms. Maria CT Zuali hian inthunnunna (discipline) a kenkawh khauh deuh avanga a hnuaia thawkte hi an lungawi lova an hêk hlawhtling ta  a nih phei chuan deparment dangah pawh nghawng tha lo tak a nei ngei ang tih a hlauhawm hle  a ni. Sawrkar thil tum tha tak office hun vawn dik, dawrtute biak tura (a tul hle  a nih loh chuan) mahni thutna kalsan lova ban huna ban tih te hi a kenkawh a har palh ang tih a hlauhawm bawkin kan hria. 

4.  Chuvangin, khing zawng zawng ngaihtuah leh mipui tana tha zawka ngaiin Sawrkar hian Director, Commerce and Industry hna atanga Ms. Maria CT Zuali a sawnna thupek hi ennawn lehin Ms. Maria CT Zualin hi Director Commerce and Industry hnaa dah let lehna tura thupek chhuah ni  thuai  se tiin thahnemngai takin kan ngen.