Excise Minister-in camping a tlawh

Armed Veng khawtlang tangrualin an veng chhunga ruihhlo ngaite tana ni 1.9.2025 atanga Agape Camping Centre, Durtlanga camping an buatsaih a, chu vawiin (9.9.2025) tlai khan Excise Minister Lalnghinglova Hmar in a tlawh.

Lalnghinglova Hmar hian kohhran bik sawi loa khawtlangin lungrual taka camping an buatsaih chu lawmawm a tih thu sawiin, 'Mahni veng chhunga ruihhlo ngaite theuh hi buaipui ila, midang kuta dah loin. Kan ziaawm deuh ka beisei,' a ti.

Armed Veng khawtlang tangrualin a lo suangtuah thin anga an venga ruihhlo ngaite tana camping an buatsaih chu lawmawm a tih thu sawiin Excise Minister chuan, 'Hei hian rah tha a chhuah ngei ka beisei. Sorkar pawhin theihtawp chu a chhuah zel ang, a tlanchhe dawn lo,' tiin Armed Veng tih dan chu veng dang pawhin entawn atana tha a tih thu a sawi.

Excise Minister hian Armed Veng khawtlangin camping an buatsaih tanpuina atan Rs. 15,000 a hlan.

Armed Vengah hian kohhranah - Presbyterian Kohhran pahnih, Salvation Army, Salvation Church leh UPC (NEI) an awm a, anni ho hian camping atan pawisa thawh vekin, Presbyterian Kohhran hnuaia Kohhram Hmeichhe pahnihte pawhin pawisa an thawh ve ve. Local Council, YMA, MUP leh MHIP-te pawhin pawisa an thawh a, branch pahnih KTP-te'n sound system leh tul dangte an thawh thung.

An veng chhung mi chhungkaw eng emaw zat pawhin camping atan hian pawisa an thawh a, pawisa thawhtu zingah Bialtu MLA B Lalchhanzova leh Bialtu Corporator Christina Roluahpuii Sailote pawh an tel.

Camping committee fel tak in dinin, anni kaihhruaina hnuaiah hian camping hi kalpui a ni. Camp-a lut tur awma ngaite chu YMA lamin lekha pein, camp lut tur hian an sawm. An venga medical lam thiamte an in duty chhawk a, security lam chu VDP, YMA, Kohhran Pavalai Pawl leh KTP kutah dah niin, a chhawkin an duty thin a ni.