Sanghal leh tangkawng thiin an hmu

Tunhnai khan ram kalten Saipum ram chhung, Tuirial Hydel Project area-ah sanghal paruk leh tangkawng pakhat thiin an hmu.

Saipum branch YMA President CS Lalthlamuanga sawi danin, sanghal thi te hi kal kalta Zirtawpni khan kawng bul maiah hmuh an ni a, a nu puitling pahnih leh a pa khat bakah a note pathum a ni. Hliam an neih hriat a ni lo.

Eng vanga thi nge tih leh eng tika thi nge tih pawh hriat a ni lo. Sanghal ruang an hmuhna thlang lamah chakai meichher chhiten Inrinni zan khan tangkawng thi an hmu leh.

Saipum YMA President chuan, "Sanghal ruangte hi inhnai te te ah an awm hlawm a, sanghal note hi sum 3 bawr vel an ni a, a nu puitling hi pahnih leh a pa pakhat an ni," a ti a, NEEPCO complex paltlang a ngaih vangin eng zau mah (lo nei) a awm loh thu a sawi.

Hetih rual hian Tuirial lui dungah mi ṭhenkhatin sanghal ruang an hmuh thu an sawi leh zauh ṭhin a, hengte erawh hi chu YMA-in finfiahna an nei chiah lo chungin an chhuizui mek.

Sanghal thi an hmuh chungchang hi Pualreng Sanctuary lam thuneitute pawh hriattir an ni a, anni pawhin Sanghal ruang te hi an enfiah chungin senghawi lem lovin an kir san leh a, YMA president chuan a pawi tih a sawi. "Vawk pul hri African Swine Fever vang te pawh a ni thei a, mipui vantlang tan Sanghal ruang hlawma phum ngawt mai chu a ṭha lovin kan hria. Hei vang hian YMA chuan mipui kal kan remti lo a ni," a ti.