Lungawi lohna lantir tan

All Mizoram CSS Employee Coordination Committee (AMCECC) chuan vawiin (9.9.2025) atangin sorkar laka lungawi lohna lantirna atan a huhoin chawlh (mass casual leave) an tan tan. September 11 thleng mass casual leave hi lak an tum.

AMECC-in report an dawn chinah Mizorama Sorkar damdawi in hmun hrang hranga CSS hnuaia thawkte an chawlh avangin damlo enkawl kawngah harsatna nasa tak a thleng. PHC/ UPHC leh Sub Centre eng emaw zat khar a ni. Hei bakah hian zirna lama thawktu tam zawk an chawlh avangin sikul 500 chuangah zirna kalpui  theih a ni lo. DEO leh DPC office tam zawk pawhin hna an thawk mumal thei lo.

Development works khawihtu department hrang hrang - RD&AD, UD&PA, Agriculture, Horticulture etc. hnuaia CSS staff-te an nawrh tel avangin heng ni 100 inhlawhna, self help group kaihhnawih, digital crop survey, in sak tanpuina etc.-te kalpui theih a ni lo. Social Welfare hnuaiah Women & Child Development a hna kal mek a chawl vek.

AMCECC chuan 'Regularisation of CSS Employees Scheme, 2024' hi a taka an hman thuai theih nan leh siamrem ngaite siamrem sak turin an phut. He scheme hi AMCECC Affiliated Association leh member ni loten hman ve an remti lo. AMCECC hmalakna zawm loten he scheme hi hman tum lo turin an hriattir a, hman luih tum an lo awm a nih pawhin a tawp thlengin AMCECC-in a do dal dawn.