Hmachhawp kan ngah hle - Vanlalsailova

Dampa Bial MLA by-election lo awm tur atana ZPM candidate tur Vanlalsailova chuan Dampa Bial hmasawnna atan hmachhawp an ngah thu sawiin,  thu belhchian dawl lo leh dawt hmanga inbei lo turin mipuite a ngen.

Campaign-a Dampa Bial chhunga cham mek Vanlalsailova chuan, 'Kan Bialtu MLA in hun lo taka min boralsan hi kan tuar em em a, a hmun ruak hi a zau dawn. Inthlang ram kan nih angin kan hotuten duhsak takin helai bial ding turin min dah leh a, bial mite khawngaihna ka rawn dil leh a ni,' a ti.

Vanlalsailova chuan Dampa Bial hian hmasawnna hnathawh tur hma chhawp an ngah thu sawiin, 'Sawrkar lai tha chakna ringin kan bialin hma chak taka a sawn theih nan kan zavaiin tangrual ang u,' tiin thu belhchian dawl lo leh dawt hmanga inbei loin, thianghlim taka he inthlan hi hmachhawn turin mipuite a ngen.