Court thu angin thubuai ziaklut

ZPM Thalai Southern Hqrs, Lungleiin nimin (14.7.2025) a  Lunglei HPC Vice Chairman V. Malsawmtluanga, Lunglei North Bialtu MLA social media-ah mawi lo tak leh thu belhchian dawl lo hmanga  tih mualpho a ni tia Lunglei Police Station-ah FIR  an thehluh chungchangah thubuai ziahluh a ni.

Thulaknain a tarlan danin, ZPM Thalai Southern Hqrs, Lungleiin FIR an thehluh chungchangah hian court chuan thubuai ziaklut a, chhui chiang tura a tih angin vawiinah Lunglei Police Station-ah thubuai ziahluh a ni.

Lunglei N Bialtu MLA mawi lo taka puhna chungchangah hian Mausen Unit ZPM chuan mawhphurtuah puhin an adviser TC Lalzarzova nihna an hlihsak bakah, an party primary member atanga ban turin ZPM thuneitu sangah an thlen.

Tarlan tawh angin, ZPM Thalaite hian FIR hi an president Vanlalliana Pachuau hmingin an thehlut. An tarlan danin, voice call, video call, Facebook leh Whatsapp-ahte V Malsawmtluanga  hi dawt leh thu dik lo hmanga tih hmingchhiat leh tih mualpho a ni. Hetiang thil titu hi chhuichhuah saka, dan anga hmalak sak turin Lunglei Police-te hi an ngen.