Mi hming hawha sumdawngte dap chhuak turin sawm

Vawiin (16.7.2025) hian MZP rorelna sang ber dawttu Federal Council vawi 59-na MZP Conference Hall-ah neih a ni a, rorel tan hmain MZP President H. Lalthianghlima'n thu a sawi.

H Lalthianghlima chuan MZP-in Mizo hming hawha Mizoram chhunga hnamdang sumdawnna kalpui an tam ta lutuk leh an huangtau lutuk a vei thu sawiin, tlang hrang hranga MZP ten theih ang anga hnamdang hming hawha sumdawngte dap chhuaka, hmala turin a sawm.

MZP President chuan hnamdang zingah Mizoram a lirthei khalh an tam thu sawiin, 'Mistiriten an duh duh dana rate an inchhiar leh, contractor ang maia contract system a thil an kalpui hi MZP chuan kan ngaimawh hle a ni. Sawrkar hnathawk leh department zingah, an hamthatnain a ken tel entitlement aia tam lirthei kawl an awm tih MZP-in a hria. A tul angin kan bawhzui ang,' a ti.

MZP Federal Council Sitting vawi 59-na chuan, hengte hi MZP rorelna sang ber Assembly 2025 Agenda atan lungrual takin a pawm:—

1. Sairang thleng a rel a lo luh dawn avangin, Mizoram chhunga rel tlanna kawng/ chawlhhmun (Station) ah ILP checkpoint siam a nih theih nan MZP in hma la rawh se.

 2. NHIDCL hnathawh hi a that tawk loh thin avangin, MZP in a that zawk theih nan hma la rawh se.

 3. Zofa hnam inkhawmpui lian "ZOFEST" hi 2026-ah neih leh ni rawh se.

MZP Federal Council chuan, sawrkar hnathawk pension tawh rawih nawn chungchanga MZP ngaihdan a la ngai reng tih nemnghetin, sawrkar hnathawk pension tawhte rawih nawn an nih loh nan hmalak zel nise, a ti. 

MZP Federal Council-ah hian, MZP Headquarters, Sub Headquarters, Branch, Hnampual leh College SU atangin rorel palai an tel a ni.