Scrub typhus-ah Ph.D hmu

Lalfakzuala Pautu s/o Zachhunga, Serchhip Field Veng, Durtlang Leitan a khawsa mek chuan Mizoram a natna larber te zinga mi, rannung seh natna kan tih mai, Scrub typhus natna zirchianna a neih  atangin Ph.D degree a hmu. 

Lalfakzuala Pautu hian Dr. Vanramliana, Associate Professor, Department of Life Science, Pachhunga University College kaihhruaina hnuaiah research hi a bei a ni. A thesis thupui chu; Epidemiological Study and Vector Identification of Scrub typhus Disease in Mizoram, Northeast India tih a ni a, he a zirchianna ah hian, Mizoram chhunga rannung seh natna hrilen dan chungchang; khawi hmunahte nge a tam a, eng hnathawk in nge vei tam ber, kum engzat in nge veitam a, eng hunlaiin nge he natna hi a tam bik tih te, a natna lanchhuah dan te, mi engzatin nge thihpui tih te zirchianna a neih bakah Mizorama Scrub typhus natna hrik thehdarhtu rannung hmuhchhuahna leh nemnghehna PCR khawl hmangin a nei bawk a ni.

Lalfakzuala Pautu hi Pachhunga University College (Mizoram University) atanga full time Ph.D degree zirchhuak hmasaber a ni a, he a research neihna field ah pawh hian Mizoramah chuan a hmasa ber ni a hriat a ni. 

Mafaka hi Mizoram sawrkar a Health & Family Welfare Department hnuaiah Entomologist hna thawk mek a ni a, Covid-19 hripui lenlai pawh khan hridona a, a hmatawng te zing a mi a ni. Scientific research paper-te pawh journal tha tak tak (scopus index journal) ah te, 20 lai a lo publish ve tawh.