Mountain bike intlansiak sawiho

Kumin kumtawpa Red Bull in Aizawla mountain bike intlansiak (urban downhill race) an buatsaih tur chungchang ngaihtuahin vawiin (15.7.2025) chhun khan Sports & Youth Services leh Tourism Department changtu minister Lalnghinglova Hmar hoin sawrkar department aiawh leh khawtlang hruaitute an thukhawm.

Khawpui chhunga mountain bike intlansiak, ‘Red Bull Aizawl Tlang Ruam’ hi October 26, 2024 khan a vawikhatna’n hlawhtling taka buatsaih a lo ni tawh a, Asia khawmualpuia Red Bull buatsaih urban downhill mountain bike intlansiak hmasa ber a ni nghe nghe. Nikumah khan mi 22 intihsiakin, cycling khawvela mi langsar pahnih – Tomas Slavik (Czech Republic) leh Pedro Burns (Chile) te chu mentor niin an tel.

Lalnghinglova Hmar chuan Aizawl Tlang Ruam chu kuminah lian zawk leh huamzau zawk, intihsiakna kalkawng pawh harsa (challenging) leh thui zawk a buatsaih tum a nih thu a sawi a, 'India leh khawvel hriatah Tlang Ruam hi a tha zawnga Mizoram phochhuahna remchang leh pawimawh tak a ni a, sports intihsiakna a nih piahlamah mipui tan intihhlimna, mi tamtak tan eizawnna siamtu leh tourism-a hmasawnna thlen theitu ni bawk a nih avangin, lian leh ropui zawka ti tur chuan theihtawp chhuaha tanrual a ngai,' a ti.

‘Aizawl Tlang Ruam 2025’ hi November thlaah nei tura ruahman niin, Upper Republic atanga ITI kawn thleng tlan tura ruahman chhin a ni. Intlansiakna kawng (route) piahlamah media coverage leh inbuatsaihna dangte pawh international standard vek a kalpui tum a ni. Event pumpui hi Jio TV kaltlanga live a pekchhuah tum a ni bawk.

Vawiin-a meeting-ah hian Tlang Ruam event kaihhnawih sawrkar department hotute bakah intlansiak neihna hmun tur Upper Republic, Republic, Republic Vengthlang leh ITI Veng Local Council aiawh te, Mizoram Cycling Association leh Red Bull India aiawhte an tel a ni.