Zirlaite'n badge dum an bel dawn

Govt. Serchhip College Students' Union chuan thuchhuah siamin, Mizoram Sawrkarin an college-a zirtirtu indaih lohna nasa tak an tawh mek avanga zirtirtu dahbelhsak tura an ngenna leh, college campus kawng, vantlang kawng ni bawk pawh ni 16.4.2025 a dang hial khawpa an thil phuttihhlawhtlinsak tura an ngenna chu, Higher & Technical Education Minister-in, Deputy Commissioner, Serchhip District kaltlanga academic session thar tan hma ngeia chinfelsak a tiam angin dawhthei takin an lo nghak tih an tarlang.

Govt. Serchhip College tarlan danin, July thla a inherchhuah thleng pawhin, sawrkarin zirtirtu rawn dahbelhsak chu sawi loh, an college-a Department of Political Science leh Dept. of Geography a casual Faculty post an neihsa pakhat ve ve lak sak an ni. Zirtirtu indaih loh avanga harsatna nasa tak zirlaiten an tawh mek lai leh, dahbelhsak tura an ngen leh dahbelh ngei pawh an intiam lai a, an intiam anga Department of Computer Applications, Department of Geography leh Dept. of Zoology-a tun thlenga zirtirtu dahbelh sak an ni lo.

Tin, college dangten an dil miah lo chunga zirtirtu pek belh an nih lai a, an college-a academic department pahnih atanga zirtirtu post laksak belh leh hian a hma atanga zirtirtu an indaih loh sa tawhna chu rawn belhchhahin, zirlaiten harsatna an tawh phah nasa hle a ni.

Sawrkarin kan ngenna hmasa leh an intiamna anga zirtirtu min dahbelhsak lo leh, a awm sa lakthensak leh ta mai pawi an tiin an rilru a na takzet tih tarlangin Govt. Serchhip College SU chuan, 'Sawrkarin a intiamna anga hma a lak loh avanga kan lawm lohna leh duhlohna lantirna atan te, a rang thei ang bera an intiamna ang ngeia kan indaihlohna departmenta zirtirtu min dahbelhsak thuai tura kan phutna atan, Govt. Serchhip College zirlai te chuan July 16, 2025, Nilaini atanga July 18, 2025, Zirtawpni thleng hian badge dum bel chungin class kan kal dawn. Kan hmalakna hian awmzia a neih loh va, huntiam chhunga sawrkar atanga thu lawmawm hriat tur a awm lo a nih chuan, a aia na zawkin hma kan la chhunzawm dawn a ni,' an ti.

Thlalak : Govt. Serchhip College zirlaite'n ni 16.4.2025-a kawng an dan tum...