Aizawl Bazarpui dinhmun ennawn

Vawiin (15.7.2025) chhun khan Commerce & Industries Minister F Rodingliana hoin a office-ah department thuneitute Aizawl Bazarpui tia hriat, Aizawl City Centre leh Aizawl City Centre Annexe Building sak mek dinhmun ennawnin an thukhawm.

Meeting-ah hian Bazar building thiah hmaa seat lo nei, ministry hmasa in bazar building sak zawh a nih huna seat pek leh tura inremna a siam pui mi 1,300 chuangte chungchang ngaihtuah a ni a, heng mite chungchang hi endik leh vek ni se tiin an rel. Sorkar dan ding lai angin heng bazar seat-te hi midang kuta hlanchhawn emaw hralhchhawn khap tlat a ni a, a tir a seat pek (original allotee) te ngeiin bazar seat hi an la luah em tih uluk taka endik nise tiin an rel.

Endikna hi voters ID leh original document hrang hrang te hmanga uluk taka endik tur niin, allotment neitute pawh koha interview neih pui an ni ang.

Bazar seat-te hi hralh chhawn emaw in hlanchhawn emaw phal loh a nih vang hian, hetianga lo ti man chhuahte chu an allotment cancel ni se, tih a ni.

Tin, eitur zawrhna sira hriselna atana tha lo heng vaihlo, tuibur leh a dangte  seat allotment hi a ṭul dan a zira ennawn leh ni se tiin rel a ni.

Bazar building pahnih- Aizawl City Centre leh Aizawl City Centre Annexe Building sak mek ah hian tuna ruahman dan chuan dawr 1,415 awm thei tura duan a ni a, ministry hmasa in bazar building sak zawh a nih huna seat pek leh tura inremna a lo siam pui mi 1300 chuang an awm mek a ni.