CM-in thliarkar rilru tha a ti lo
admin 12-Dec-2024 06:36 PM
New Serchhip chuan vawiin (12.12.2024) hian Govt. Serchhip College campus-ah kum 50 (golden jubilee) tlin an lawm a, Chief Minister Lalduhoma, Bialtu MLA-in a hman pui.
Chief Minister chuan, New Serchhip mipuite lawmpuiin khawtlang hruaitu lo ni tawh thin zawng zawng te chungah lawmthu a sawi a, 'Kum 50 chhungin New Serchhip chu Village Council pahnih leh branch YMA pali ni khawp hialin a thang lian. Zirna lamah college thuthmun a ni a, sawrkar hmun pawimawh tam tak an awm. Thang lian zel turin ram rem tak a nei. Heng hi malsawmna a ni,' tiin tuna khawtlang hruaitute chu kum 50 dang lokal leh tur hmu phaka an inbuatsaih a tul thu a sawi.
Khaw tam takin harsatna an tawh chu ‘thliarkar rilru’ a nih thu sawiin Lalduhoma chuan, 'Veng bil ringawt te, thler khat ringawt te, veng tepen pakhat ringawtte tana thapui thawha bei duh pawl hi kan lo awm leh mai thin. Hetianga ‘thliarkar rilru’ zim lutuk neih hi hmasawnna daltu a ni. Infrastructure pakhat hian khaw tam tak mamawh min pe thei,' a ti.
New Serchhipah hian April, 1974 Vanlalsiama leh a nupui V Rosangite chu an fate pathum nen in sain an awm tan a, an luh kum tawp lam hian chhungkaw pakhat chuan an rawn zawm ve leh a ni. Kum telin an pung chho a, kum 2023 a an inchhiar danin New Serchhipah hian chhungkaw 980 vel, mihring 4500 vel an cheng mek a ni.
