Kohhran hrang hrangte'n joint meeting nei

Vawiin (13.9.2024) hian Mizorama kohhran inpumkhatna atana kohhran hrang hrang aiawhte chu BCM Hall, Baptist Church of Mizoram, Headquarters Office, Serkawn-ah an ṭhukhawm a, Mizorama kohhran pawl hrang hrang aiawh mi 41 an tel thei a ni. 

Meeting hi Committee Chairman Rev Vanlalnghaka, Moderator, Presbyterian Church of India, Mizoram Synod-in a kaihruai a, Committee Secretary Rev. Dr. R. Lalbiakliana, General Secretary, BCM-in report a pe.

Secretary report-ah hian meeting hmasa-in Mizorama kohhran inpumkhatna tura pawl din leh a hawnna atana publicity committee a din chuan thutkhawm vawi khat an neih tawh thu te, Council of Churches in Mizoram Executive Committee member tur kohhran pawl hrang hrang ten rawn ruat tawh thu leh an vaiin mi 50 an nih thu te, CCM Interim Budget atan kohhran hrang hrang atangin cheng nuai 27 hmuh a nih tawh thute leh CCM Office lailawk atan Synod Conference Centre, Mission Veng-ah PCI, Mizoram Synod-in an pek thute tarlan a ni.

Tun tum meeting-ah hian CCM Emblem tur thlanna te, CCM Office thawktu lak chungchang te, CCM hawn programme leh hemi atana thil tul hrang hrangte ngaihtuahin, interim budget ruahmanna leh hman mek ennawn te, CCM Rorel Inkhawm, October 26-atana thu ngaihtuah tur (agenda) chhawpchhuahte an sawiho bawk.

Meeting hmasa lamah Council of Churches din chungchang te, constitution leh council hawn hun tur leh a hmunte rel fel a lo ni tawh. October 26, 2024 khian Council Meeting hmasa ber chu Mission Veng Presbyterian Kohhran, Aizawl-ah neih a ni ang a, October 27 (Pathianni)-ah Council of Churches-in Mizoram hawnna inkhawm neih a ni dawn a, inbuatsaihna ngawrh takin kalpui mek a ni.

Council of Churches in Mizoram-ah hian kohhran pariat - Mizoram Presbyterian Kohhran, Mizoram Baptist Kohhran, Evangelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Bualpui (Ng), Wesley Methodist Church, Mizoram leh Independent Church of India-te an awm mek.