Icon top-10 te concert dawn

Lammualah hlawhtling taka concert an neih atanga thla 9 hnuah Youth Icon 2024 Top 10 te a huhoin an concert an nei leh dawn a, music video an siam an tlangzarh nghal ang.

Youth Icon 2024 Top 10 te hian ruihhlo dona hla music video an buatsaih mek a, video shooting hi an zo fel tep tawh. An music video hi September 25, 2025 zanah Dawrpui Multipurpose Hall-ah tlangzarh tumin ruahmanna an siam a, video tlangzarh zawhah concert an nei chhunzawm dawn.

Icon star-te chuan an fan-ten a huhoa concert an neih leh theih hi an beisei thin a, chumi tihhlawhtling chuan hma an la chho leh ta tih an sawi.

Concert-ah hian ticket a awm dawn a, a man erawh a to dawn lo a, tu tan pawha lei ngam tur a ni dawn tihte an sawi a; an zai lo ngaina tute zawng zawng chu concert an neih tur hi chhim vek turin an sawm a ni.

LPS Youth Icon 2024 top 10 te hian nikum December ni 14 zan khan Lammualah concert an nei a, a hlawhtling hle a, lammual khat tlatin mipui an pungkhawm.