MZP-in hnamdang dawr lo turin ngen

Vawiin (30.9.2025) chawhnu dar 1:00 khan, MZP General Headquarters, Aizawl chuan MZP Conference Hall-ah Executive meeting vawi 647-na (2025-2027 term-ah vawi khat na) neiin an thukhawm a, Sairang Rel Station tlawh chungchang, Inner line Permit (ILP) check chungchang, Student Aid Fund siam chungchang leh pawl chhung thil pawimawh hrang hrang a rel.

MZP chuan, Sairang Rel Station-a hnamdang lo luh dan endika tlawh thuai nise tiin a rel a, ILP pawh Aizawl khawpui chhungah, hun remchang hmasa berah check nise, an ti. ILP pek chhuah a nih dan leh ILP kan hman danahte thil fel tawk lo tam tak a awm niin a hria a, zirchianna neih ngei an tum.

Meeting chuan, Zirlai harsate ṭanpuina tur Students' Aid Fund pawh a rang lama siam nise tiin a rel. Student Aid Fund rules leh guidelines mumal tak siam a nih hunah zirlaiten an hman tangkai theih tura dil theih turin chhawpchhuah nise, an ti.

Meeting chuan, International Trade Expo Aizawl a neih tur chungchang a ngaihtuah a, Mizoram Merchant Association (MIMA) te nen pawha joint meeting neih ho tawh  niin, Mizo mipuite’n helai hmuna hnamdang rawn sumdawngte dawr lo tur leh hnamdang hnenah, sumdawnna atana hming hawh tir lo turin MZP chuan Mizo mipuite a ngen nawn.