Sunday School Inkhawmpui

Vawiin (8.9.2024) Pathianni hian Presbyterian Kohhran hnuaia pastor bial hrang hrangah Naupang Sunday School Inkhawmpui hman a ni.

Bial thenkhatah chuan chawhma lamah Beginner leh Primary Department-te Pathian thu leh hla hmangin an intihsiak. Bial thenkhat erawh chuan intihsiakna atan hmang loin, zirtirtute Inrinni zan inkhawm kal zat leh Pathianni-a naupang kal thate tehin lawmman siam a ni.

Chawhnu inkhawm-ah Junior leh Intermediate bakah Sacrament Department-te an intihsiakna ve leh a, kar leh Pathianni hian Senior Department-te an inkhawmpui ve thung ang. Inkhawmpuiah hian naupangte atangin recitation, zai, lam leh thiam thil hrang hrang en tur leh ngaihthlak tur a awm.

Naupang Inkhawmpui hi a tirah chuan missionary-te thahnemngaihna avanga bul tan a ni a. Kum 1931 khan Aizawl Tlangnuam Kohhranah neih tan a ni a, hei hi Naupang Inkhawmpui hmasa ber nia hriat a ni. Tunhma lam chuan Naupang Inkhawmpui hi Bial hrang hrangin an remchan hunah an buatsaih mai thin.

Tun hnai deuh atang khan bial tinte an kal rual theih na’n Mizo Sunday School Union (MSSU) chuan Sunday School Zirlai Syllabus-ah naupang leh senior inkhawmpui hun tur an ruahman tel.