Home > Mizoram News > Jt. VC, Vairengtein hriatthiam ti
Mizoram News
Jt. VC, Vairengtein hriatthiam ti
admin 22-Jul-2025 08:05 PM

Joint Village Council, Vairengte chuan thuchhuah siamin, Vairengte Senior Secondary School Chemistry Lecturer (Principal Incharge) Lalhuzauva chu hun lo takah transfer a nih thu tarlangin, 'Amak kan tiin hriatthiam harsa kan ti hle. Zirlai naupang Exam hmachhawn mêk an nih lai a, hetianga transfer a ni mai hi, thuneitu lam hian ngaihtuah nawn leh se kan duh hle,' an ti.

Vairengte Senior Secondary School Principal transfer a nih chungchangah hian thudik tâwk lo hmanga beihna a awm ngei niin an hriat tih tarlangin Joint Village Council, Vairengte chuan, 'Khawtlang hruaitu hming hawha hêktu awm anga thu thang a awmte hi thudik lo a ni a, khawtlang hruaitute atangin hêkna a awm lo a ni tih, khawtlang mipuiten min hriatsak kan duh. Lalhuzauva hi kan khaw zirna in leh zirlai naupangte tana mi inpe tak, theihtawp chhuah duh mi, kan khaw zirlaite hmakhaw ngaitu a ni a, chuvang chuan thu belhchian dawl lo hmanga hêktu an awm hi kan dem takzet a, an hêkna hi pawm thiam harsa kan ti a ni. Chuvangin, transfer order hi min sûtsak ngei turin kan sawrkar thuneitute kan ngen tak meuh meuh,' tiin transfer order sût a nih theihna atana hmalâkna awm apiang an thlawp tlat dawn thu an tarlang.




Tags: #vairengtein #hriatthiam #transfer

Bengvarna

Share :
Share on Facebook   Share on Twitter   Share on Whatsapp