Handloom leh handicraft sawiho
admin 22-Jul-2025 01:21 PMVawiin (22.7.2025) chawhma khan Ministry of DoNER hnuaia din High Level Task Force on Handloom & Handicraft Neiphiu Rio, Nagaland Chief Minister kaihhruaina hnuaia dinte chu online hmangin an thukhawm a, member a nih angin Chief Minister Lalduhoma pawhin a office atangin a lo zawm.
Chairman in thuhma a sawi zawhah Mizoram Chief Minister hi thusawi turin a sawm a ni. Lalduhoma chuan, India rama handloom lama hnathawk thei mihring zaa sawmruk te hi hmarchhaka awm an nih thu sawiin, 'Hei hian handloom lama hma kan sawn zel theihzia a tichiang hle. Chuvang chuan a taka chantir theih hmalakna tur (road map) duang ila, common facility centre nei thluah ila, kan puantahtute (artisan) training pe ila, state leh state te inthlunzawmna (inter state network) te siam ila, hmarchhak product hi quality standard pakhat hmangin branding kalpui ila, skill & design lamah thil thar (innovation) neih tumin uar ila, khawvel hriat khawpa textile hub langsar takah kan insiam theiin ka ring,' tiin a rawtna te a sawi a ni.
He online meeting-ah hian DoNER Minister Jyotiraditya Scindia, Union Minister of Textiles Giriraj Singh bakah hmarchhak state Chief Minister leh an aiawh Minister ten thu an sawi ve bawk a ni.
Ministry of DoNER hian India hmarchhak bialin hmasawnna kawng dik a zawh theih nan High Level Task Force pariat a din a, state bil anga hmasawnna ruahman ringawt lo a, hmarchhiak bial pumpui tana tangkai tur, state hrang hrang e huapzo (cluster approach) duan chhuah tumin an thukhawm thin Thla thum chhungin Task Force Report peih hman an tum ang.
