NHIDCL ED transfer a ni

MZP-ten Mizorama lokir tawh lo tura an duh NHIDCL Regional Office-a Executive Director (ED) Virendra Kumar Jakhar chu nimin (22.7.2025) khan sawn a ni.

Virendra Kumar Jakhar hi NHIDCL, Hqrs-ah sawn a ni. A hriselna dinhmun avanga sawn a dil vang niin an tarlang. Virendra Kumar Jakhar hi ruat nghal a ni a, a aiawh tur hian a zawmfel hma Manipur atangin an rawn hmui ang.

Tarlan tawh angin MZP President H Lalthianghlima chuan nimin khan press conference koin MZP rorelna sang ber dawttu Federal Council vawi 59-na chuan, 'NHIDCL hnathawh hi a that tawk loh thin avangin, MZP in a that zawk theih nan hma la chhunzawm zel rawh se' tih an rel thu sawiin, 'Hemi chungchângah hian July 17, 2025 khan NHIDCL Executive Director (ED) Virendra Jakhar sawipui tum ni mahse chawlh a lo lak avangin hmuh theih a ni lo,' a ti.

MZP chuan Mizoram ei leh bar lakluhna kawngpui pawimawh em em, kal hleih theih loh khawpa a chhiat laia NHIDCL hotupa ber Executive Director-in August 7 thleng chawlh ala daih mai hriatthiam har an tih thu sawiin H Lalthianghlima chuan, 'Mizo mipuite min hmuhsitu NHIDCL ED hi Mizoram a awm tlakah MZP chuan a ngaih loh bakah, a deputation term a tawp tawh avangin, a term pawhsei a remti,' tiin NHIDCL ED hi Mizoram-ah lo let leh tawh lo turin an hriattir nghal thu a sawi.