Home Minister-in PHQ a tlawh

Home Minister K Sapdanga chuan vawiin (22.1.2024) chhun khan Police Headquarter (PHQ) a tlawh a, DGP Anil Shukla hoin police officer-ten an lo dawngsawng.

K Sapdanga chuan police officer-te hmaah thu sawiin police-in inenkawl dan rules/manual neiin, officer-ten hlawk zawka hna an thawh theihna atan PSO, orderly, driver, cook leh lirthei an kawl theih chin a awm vek thu a sawi a, 'Kan officer chawl tawhte pawh duat zui an chakawm, mahse sipai kan indaih lohzia leh daih loh dan kan hre vek a ni,' a ti.

Police-ah post ruak tam mah se, hnawhkhat turin state sum dinhmunin a tlin rih lo tih sawiin Home Minister chuan, 'Ram pumah ṭangkai zawka hnathawk thei turin kan tih theih apiang kan dap khawm a ngai ta,' tiin Mizoram Police-ah post ruak 4,000 zet awmin, thawktu mi 8,000 zet an awm mek thu a sawi.

Home Minister chuan Home Department-in ni 8.1.2024 khan hman nghal turin thupek a tihchhuah thu sawiin, 'Danin min phalsak chin anga khawsa turin officer-te kan insiamrem mek tih ka hriatin ka lawm,' a ti.

Tuna sipai awm mekte hnathawk thei turin an intuai hriam phawt dawn tih sawiin K Sapdanga chuan, 'Lirtheite pawh a kawl turin kawl phawt se kan duh,' tiin insiamrem hnuah mamawh dan a zirin hmun ruak hnawh khah leh lirthei lei belhte an la ngaihtuah tur ta sawi.

Home Minister chuan February, 2024 chhung hian insiam rem zawh hman an tum dawn tih sawiin, 'Loh theih loha siam rem ngai an awm loh ka beisei,' a ti.