Mamit District MJA-in zawtfiah
admin 28-Jun-2025 12:05 PMMamit District MJA-te chuan nimin (27.6.2025) khan Mamit District Hospital an tlawh a, Mamit District Hospital atanga dialysis khawl la chhuaka Serchhip District Hospital-a dah a nih chhan an zawtfiah.
Mamit MJA-te hian ni 26.6.2025 khan khan CSR atanga Mamit District Hospital-in a dawn dialysis khawl pakhat chu, Serchhip District Hospital-a hman turin phurhchhuah niin an hria a, Health Department hotute a chhan an zawtfiah.
Health Director SR Ngurchamliana chuan Serchhip hian a khawl hmanna tur hmunhma an lo tihfel vek tawh bakah hmangtu tam zawk an ni a, chutih laiin an dawn ve tur a lo la thleng lo tih sawiin, 'Serchhip ta tur a lo thlen veleh Mamit District Hospital-ah dah a ni ang. khawl thar hi a lo thlen vat theih nan leh Mamita dah let leh ngei a nih theih nan keima power pawn theihtawp ka chhuah ang,' a ti.
Mamit District Hospital DMS Dr Lalrinfela sawi danin, Mamit District Hospital hian dialysis khawl pali an nei a, Serchhip District Hospital-a hman lailawk tur hi pahnih a ni. Dialysis khawl hmang turin RO plan a la ngai a, hospital building thar luah hunah chuan bn theih a ni dawn a, a khawl enkawltu tur pawh training tir a la ngai.
Mamit District MJA-te chuan heng khawl laksawn tak hi a hnawhkhahna tur a rang lama hmuh leh ngei an beisei thu Health Department thuneitute an hrilh.
