CSR Cell din a nih chhan sawifiah

Vawiin (27.6.2025) chhun khan I&PR Conference Hall-ah Mizoram CSR Cell leh Confederation of Indian Industry (CII) te tangkawpin ni thum chhung awh Capacity Building Workshop for NGOs & Implementing Agencies an buatsaih kharna hun hman a ni a, Chief Minister Lalduhoma'n a hmanpui.

Chief Minister chuan, India ramah company tam tak an awm a, dan anga CSR thehchhuah tur an ngah a, a kum telin a pung zel tih sawiin, 'Chutiang a nih lai chuan Mizoram chu CSR dawng tlem ber state kan ni reng thin. CSR fund hmang hian ram hmasawnna hna, lian leh pawimawh tak tak a thawh theih a, Serchhip Hospital building sak nan pawh khian cheng vbc. 21 zet kan hmu a ni. State dangte aia kan hnufual chhan hi CSR implementing agency kan neih tlem bik vang a ni deuh ber a, Implementing Agency tam zawk kan neih theih nana hma la turin Chief Minister Office-ah CSR Cell kan din ta a ni,' a ti.

Kawng hrang hrangin hma an la nghal a, sensitisation programme an huaihawt tih sawiin Lalduhoma chuan, 'Bangalore lamah UNDP nena tangkawpin road show an zuk nei a, talk show an buatsaih a, tunah CII nena tangkawpin he programme hi an buatsaih leh ta a ni. Kan mamawh hmasa chu registered agency tam zawk neih a ni avangin he training rawn chhimtu NGO ten implementing agency rawn nih ngei in tum tlat dawn nia. He programme chhimtu, kan society, NGOs leh hospital-ten registered agency nih theih ngei in lo tum ang. CSR Cell hi nangmahni tanpuitu tura din a ni,' tiin a hrilh.

CSR Cell Chairman TBC Lalvenchhunga, Adviser to CM pawhin thu sawiin, 'Training chhimtute kal zelna turah CSR Cell hi biak theih reng kan ni,' tiin implementing agency nih tum zui ngei turin a chah.