Dr N Palai hremna puang
admin 14-Aug-2023 01:29 PMAizawl District Court-a Special Judge (Prevention of Corruption Act) Dr HTC Lalrinchhana chuan ni 11.8.2023 a eiruk thubuaia thiam loh a chantir National Rural Health Mission (NRHM) Director hlui Dr N Palai hremna chu vawiin (14.8.2023) hian a puang.
Special Judge chuan Dr N Palai hi kum 1 tang tur leh cheng nuai 24 chawi turin a hrem a, pawisa hi a pe thei lo a nih chuan kum 12 a tan belh ang.
Special Court-in thiam loh a chan tir Dr. N Palai hi bail a alo chhuah tawhna chu hnawl (cancel) nghal a ni a, jail ah dah luh a ni.
Court thutlukna-a tarlan a nih danin, he thubuai hi ni 13.1.2010 ah Superintendent of Police, ACB hnenah PRISM President Vanlalruata leh PRISM GS RL Liantluangate thubuai theh luh atanga rawn irhchhuak a ni. Dr N Pallai, chutih laia NRHM Mission Director leh Health Services Department Director ni bawk laka thubuai a ni.
October, 2009 khan a tak huaihawt si loin tum li lai zir hona (workshop) nei angin chuta sum senso Rs. 4,19,360 chu ei ru a puh a niin, Rs. 4,19,360/ Dr N Palai an a lo kawl a, hnuchhui a nih avangin account section lama a lo dah let leh chu ACB-te hian an man nghe nghe a ni.
Kum 2008 ah contractor pawh ni lo Hunliannghaka, Baktawng hmingin Health Sub-Centre 10 thawmthatna tur hna pe chhuakin a vaiin Rs. 35,40,000 man a ni. He hnathawhna bill hi Hunliannghaka hmingin cheque-a pekchhuah a ni na a, Mizoram Rural Bank, Dinthar Branch-a Dr N Palaia bank account kaltlanga lakchhuah a ni thung.
Melriat Sub-Centre, Keitum Sub-Centre and Dampui Sub-Centre te hi a bikin an hnathawh leh sum sen hi a inmil lo hle tih hmuhchhuah a ni. Tichuan, a lo berah Rs. 11,85,533 hleprukna hmuhchhuah a ni.
Kum 2007 khan Lalrinliana, Republic Veng, Aizawl hmingin PHC 19 zet te thawmthatna tur work order pekchhuah a ni a, damdawi in pakhat zel tan hian Rs. 50,000 zel hisap a ni. Tichuan, bill lem hmangin pawisa cheng nuai 9.5 chu lakchhuah a ni a, he pawisa hi a hmanna tura hman a nih loh bakah Dr N Palai-a hnenah hlan a ni. Lalrinliana hian a hminga hnachhuak hi a lo hre lo hrim hrim bawk. PHC 15 te hi thawmthat an ni lo hrim hrim tih hmuhchhuah a ni bawk.
August, 2007 leh October, 2007 chhung hian PHC 36 zet te rawnghnawih thatna tur PHC pakhat atan Rs. 50,000 zel hisapin bill lem hi siam a ni a, heta PHC 24 zet te hi ataka rawnghnawih that ni miah lo hemi atana ruahman sumpai hi eiruk ni ngei a hmuh a ni.
A chunga puhna hrang hrang ah hian court chuan ACB lam hian an thubuai hi an finfiah zo a ni ti a thutlukna siam in Dr N Pallai hi section 409/420/477A and u/s 13 (2) r/w 13 (1) (c) (d) of PC Act, 1988 hnuaiah thiam loh chan tir a ni a, ACB te pawisa man Rs. 4,19,360 hi sorkar pawisa tura chhuhsak nghal a ni bawk.
Hetih lai hian sawrkar dan leh hrai leh kalphung ang nilo a computer pahnih Lunglei Civil Hospital tih changtlunna tur Rs. 1,54,694 hmanga a lo lei thuah chuan, hei hi chu ama mimal sumpai tur leh hamthatna tur bil atana hman khaw lohna finfiah a nih loh avang in sorkar hnathawk a nih anga achunga thuneituten sorkar hnathawkte inkhuahkhirhna dan (disciplinary proceedings) hmanga hrem tur zawk a ni ang tiin criminal thubuai ah chuan thiam chantir a ni thung.
Special Court chuan Dr N Palai hi ni 15.5.2023 khan thubuai dangah kum 4 jail tang tur leh cheng nuai 24 chawi turin a lo hrem tawh bawk.
