In sak lai thiat turin ti

National Highway-54 laih zauh leh siamthat hna kalpuia ram lak tawh chhunga in lo sa thar mi pahnihte chu nimin (5.6.2025) khan an in sakte thiat tura hriattir an ni.

Lenkawl Editor Zonuna Kawlni hnen atanga thudawn danin, Serchhip District chhunga NH-54 laihzauh leh siamthat hna thawh a nih khan kawngpui zauhna tur hian ram eng emaw zat chu dan angin lak a ni. Zangnadawmna pek a nih hnuah kawng siam hna hi an thawk zui.

Hetihlai hian heng ram lak tawh, kawngpui atana la hman si lohah hian mi thenkhat chuan in an lo sa leh a, hengte hi nakin zela harsatna siam thei turte a la nih avangin hemi chungchangah hian dan anga hmalak a ni ta a ni.

Nimina in thiat tura hriattir mi pahnihte hi Chhingchhip Mualpui-a awm te niin an zinga pakhat hian zangnadawmna a lak hnuah Right of Way (ROW) huamchinah in hi a sa thar a, midang pakhat zawk hi tunhma deuh, kum 2013 chho-a Chhingchhip Mualpui-a leimin avanga NH-54 siamthat a nih tum khan a ram hi dan anga lak sak ni tawhin helai hmun ah hian In sa turin ban a lo phun leh a ni.

Thla hmasa khan an in sakte hi thiat tura hriattir ni tawhin nimin thlenga an la thiah loh avangin an in sak te hi thiat turin a hmunah hian Magistrate leh Police-te leh thawktu dangte an kal a ni.

Mi pahnihte hian chawlhkar khat chhunga thiah an tum tur thu an lo sawi avangin an in sak te hi thiah sak a ni ta rih lo a, an huntiam a ral hnuah enfiah leh tur a ni ang. Heng in sakte enfiah a nih lai hian in satute leh Village Council hruaitute pawh an tel a ni.