Minister-in NHIDCL-te mawhpuh

Agriculture Minister PC Vanlalruata chuan tunhnai khan Serchhip Zawlpui Zaua chhiatna nasa tak thleng a hmunah a tlawh a, loneituten harsatna an tawh dan leh an mamawhte an lo thlen.

PC Vanlalruata chuan ruahsur nasa avanga loneitute tawrhna a tawrhpui thu leh theihtawp chhuaha sawrkarin an tana hma a lak tur thu a sawi, Zawlpui leilet mai bakah Serchhip khawpui chhunga chhiatna thlen nasatzia a takin a hmu a, Mizoramah pawh a tuar nasa ber an ni tih sawiin, 'Ngai in awh leh theih nan sawrkarin theihtawp a chhuah dawn. NHIDCL te kawng siamin a nghawng, Serchhipa tunhmaa la thleng ngai lo, Zawlpui leilet hmunhma heti taka tuilianin a ti chhe ta hi a pawi. Hmasawnna ruhrel din a nih rual a, environment ngaih pawimawh tel a tulzia te, fimkhur a tulzia te a tilang chiang hle a ni,'  a ti.

Zawlpui zauah hian tun tum ruah sur nasa khan leilet tam tak tichhiain tui lakna a tichhe hneh hle . Zawlpui panna kawng pawimawh Tuichar lei chu a bung a, Tuichar lui luanna  pawh a in sawn. Leilet neitu ten tui an lakna luite luanna hmun insawn leh lei dang chhia a awm bawk a ni. Zawlpui leilet neitute chuan Tuichar lei siamthat thuai an mamawh thu leh an tui lakna siam that an mamawh zia Agriculture Minister hnenah hian an thlen a ni.