Sikul kai tur an dang

Govt High School Tlabung atanga mathematics zirtirtu sawn chhuah tumna a awm chu an duh loh avangin mipuiten vawiin (6.6.2025) hian zirtirtu leh zirlaite sikul kai tur an dang. 

Tlabunga tlawmngai pawl hrang hrang, tunhnaia thukhawm chuan Govt Tlabung High School-a mathematics zirtirtu sawn chhuah tumna chu an duh lo a, June 2, 2025 hma ngeiin transfer order sut turin sorkar an phut a ni.

Tlabung khawtlang hruaitute sawi danin, Govt Modern High School, Lungtiana mathematics zirtirtu chu Aizawlah transfer a ni a, hemi thlakna atan hian  Govt Tlabung High School-a mathematics zirtirtu chu transfer ve leh a ni.

Khaw dang buaina chinfel nana Tlabung an hmang chu Tlabung mipuite chuan duh loin, zirtirtu leh zirlaite sikul kai tur hi vawiin atangin an dang a ni.