SASCI Monitoring Committee din rel

Vawiin (6.6.2025) chhun khan Planning Department Conference Hall-ah Chief Minister Lalduhoma kaihhruaiin High Level Meeting on SASCI neih a ni a, Chief Secretary kaihhruaina hnuaia SASCI Monitoring Committee din an rel.

Chief Minister chuan SASCI kalpui meka sawrkar duh dante sawiin, 'SASCI hi kan ramin hmasawnna ruhrel tha leh tlo a neih theih nan a tha em em a, department-ten tha thlah lo va tan kan lak a tul hle. Part 3 bikah hian, state leh UT ten Centrally Sponsored Scheme hmanga infrastructure kan thawhnaa state share-a kan hman theih tur cheng vbc. sing khat dah a ni,' a ti.

A che hmasa sa (first come first serve) tan a nih avangin chet ran zel a that thu sawiin Lalduhoma chuan, 'Hmasawnna hnathawhna kawnga state rethei deuhten harsatna kan tawh nasat tak mai chu state share tur kan nei thin lo hi a ni. Part 3 hian chu mia kan mutan chu min sutkiansak thei a ni,' tiin department hrang hrangten SASCI hmalaknaah theihtawp an chhuah vanga a lawm thu a sawi.

Planning Secretary Lalmalsawma'n SASCI part hrang hrang sawifiahin, chu mi hnuah hmachhawp awmte leh chak deuh zawka hnathawh a tulna lai te an sawi. 

A bik takin reform link incentives hmuh theihna SASCI part 5 - Mining Sector Reform chungchang te, part 6 - Scrapping of Old Vehicles & Electronic Enforcement of Road Safety chungchang te, part 7 - Land Related Reforms by State Government in Rural Areas te, part 8 - Land Related Reforms by State Government in Urban Areas te, part 9 - Incentives to State for Efficiency in Financial Management chungchang te, part 10 - Urban Planning Reforms 2025-26 chungchang te chipchiar takin an sawi zui. Incentives te hi a tam thei ang ber dawn tumin sawrkar chuan tan a la dawn a ni.