Kolasib MZP-in khawmpui an hmang

MZP Hqrs., Kolasib chuan nizan (22.3.2023) khan Buhchangphai Community Hall-ah khawmpui an hmang a, khuallian Kolasib Bialtu MLA K Lalrinliana, Minister chuan MZP chu sorkar kal sual tur venna leh khalh ngiltu hmanraw pawimawh tak an nih thu a sawi.

K Lalrinliana chuan MZP dinchhan pawimawh tak takte sawiin, 'Zirna tih hmasawn bakah kut hnathawh chawisan chu kan ram intodelhna tur chuan nasa lehzual a kalpui a tul,' tiin zirlaite chu zirna hmanga mahni intundinna tur a hnathawh leh a tul apianga intodelh tur a kut hnathawh zahpui lo turin a chah.

Ram leh hnam tana MZP an lo penchhuah tawhna fakawm a tih thu sawiin K Lalrinliana chuan, 'Zofate inpumkhatna tura MZP-te hmalakna a ropui hle,' a ti.

Khualzahawm Tuirial Bialtu MLA K Laldawngliana chuan MZP chu zirlaite hamthatna humhalh sak tur a pawl din ni mah se, ram leh hnam hmangaihna inzirtirna hmun pawimawh a nih tel a tul thu a sawi

MZP Headquarters Kolasib Conference-ah hian thurel hrang hrang neiin, chung zingah chuan - Kolasib District chhunga zirna tih hmasawnna tura hmalak te, commerce subject zirna bultan a nih theih nana hmalakte leh Kolasib District chhunga hnam dang dan loa awm dapchhuah an nih theih nana hmalakte a tel.