Sazuin rannung seh natna hrik an pai

Mizoin rannung seh natna kan tih mai, Scrub typhus natna zirchianna a neih  atanga Ph.D degree hmu Lalfakzuala Pautu s/o Zachhunga, Serchhip Field Veng, Durtlang Leitan chuan sazu (rat) ah Scrub tyhus natna pai tuhrik a awm thu a sawi.

Lalfakzuala Pautu sawi danin, sazuah hian Scrub typhus natna hrik paitu tuhrik an awm avangin sazu khawih nasa (zupawl man thin etc) ten kaiin, midang an kai chhawng thin a ni. Zupawl saahte ngei pawh Scrub typhus natna hrik paitu tuhrik hmuh chhuah a ni.

Tin, zawhte leh uite ten sazu (Scrub typhus natna hrik paitu tuhrik) an khawih, an ei etc. hnua kan ina duh duha khawsak leh si hian mihringah min kai chhawng thei. 

Mizorama sazu zingah Aizawl District-a sazuten Scrub typhus natna hrik paitu tuhrik an kai nasa bik.

Tarlan tawh angin, Lalfakzuala Pautu hian Dr. Vanramliana, Associate Professor, Department of Life Science, Pachhunga University College kaihhruaina hnuaiah research hi a bei a ni. A thesis thupui chu; Epidemiological Study and Vector Identification of Scrub typhus Disease in Mizoram, Northeast India tih a ni a, he a zirchianna ah hian, Mizoram chhunga rannung seh natna hrilen dan chungchang; khawi hmunahte nge a tam a, eng hnathawk in nge vei tam ber, kum engzat in nge veitam a, eng hunlaiin nge he natna hi a tam bik tih te, a natna lanchhuah dan te, mi engzatin nge thihpui tih te zirchianna a neih bakah Mizorama Scrub typhus natna hrik thehdarhtu rannung hmuhchhuahna leh nemnghehna PCR khawl hmangin a nei bawk a ni.

Lalfakzuala Pautu hi Pachhunga University College (Mizoram University) atanga full time Ph.D degree zirchhuak hmasaber a ni a, he a research neihna field ah pawh hian Mizoramah chuan a hmasa ber ni a hriat a ni. 

Mafaka hi Mizoram sawrkar a Health & Family Welfare Department hnuaiah Entomologist hna thawk mek a ni a, Covid-19 hripui lenlai pawh khan hridona a, a hmatawng te zing a mi a ni. Scientific research paper-te pawh journal tha tak tak (scopus index journal) ah te, 20 lai a lo publish ve tawh.