Cancer tuarte tan MZI
admin 17-Jul-2025 12:23 PMMizo Zaimi Inzawmkhawm (MZI) chuan cancer natna tuar harsa zualte tan an pen chhuak dawn.
July 18, 2025 (Zirtawpni) zan dar 8 atanga tanin, MZI chuan charity event an buatsaih dawn. He event atanga sum tlingkhawm zawng zawngte hi cancer natna tuar, inenkawlna senso harsa zualte tan an hlan vek dawn a ni.
Ignite Studio-ah hun hman tur a ni a, he studio atangin live-a pek chhuah a ni dawn a. LPS, Zonet leh MZI YouTube channel-ah te pek chhuah a ni ang.
He charity event-ah hian zaithiam hrang hrang an inlan dawn a. Vehbur khawn chhung hian zaithiamte hian zaiin hun an hmang dawn.
He event-ah hian Youth Icon star rual inlan tur zingah Lalsangliana (Taitea), Peter-a, BK-a, Samsona, Zothanpuii te bakah K Lalthlamuankimi, Dreamhunter vocalist Muanpuia, Jonathan Lianhna, TBC Zaithanpuia, Daniel Lalawmpuia, Lallawmawma, Lalramchhana, Remrema, Sangkimi Khiangte, Lydia Pachuau, Dr Shirley, Lalbiakhluni Colney leh hranghlui super trio - Lalhungchhungi Pachuau, Sailothangi Sailo leh Zosangliani te leh midang dang an inlan dawn a ni.
Phone call lo chhang turin zaithiamte bakah Nunui Rualhleng leh Sangsangi te an thu tel dawn.
MZI chuan an charity event buatsaih turah hian tawiawm theuh turin mi zawng zawng an sawm. Tanpuina hi tlem lua awm lo, tam lua awm lo, pe theuh turin an ngen nghal.
