Education Minister-in zirlaibu a tlangzarh
admin 17-Jul-2025 04:47 PMMizoram Board of School Education (MBSE) in class XII zirlaibu - Physics, Chemistry, Biology leh Mathematics, Mizo tawnga buatsaih vawiin (17.7.2025) chhun khan a tlangzarh.
Education Minister chuan New Education Policy 2020-in a beisei anga zirlaibu eng emaw zah Mizo tawng a buatsaih a nih tawh bakah, vawiina class XII Science leh Mathematics zirlaibu hman tur, Mizo tawnga buatsaih, tlangzarh leh chuan Mizoram chhunga zirnain hmasawnna a hmuh phah ngei a beisei thu a sawi.
MBSE hmalaknain class X - Maths leh Science subject lehkhabute kha tihchhuah hmasak ber an ni a, kum 2022 kum tawp lamah (November 30, 2022) khan chhuah a lo ni tawh. Class IX Maths & Science lehkhabu chu 2023 kumtir (February 6, 2023) khan tihchhuah a ni. Class IX leh XI lehkhabute hi MBSE in copyright a neih textbook an nih avangin translation type-a buatsaih a ni thung.
Class XI leh XII erawh chu copyright-te a awm theih avangin translation ni tawh loin, textbook writers-ten reference material eng emaw zat nen tangkawpa anmahni irawma an buatsaih a ni thung. Class XI Physics, Chemistry, Biology leh Mathematics textbook-te chu June 28, 2024 khan tlangzarh an lo ni tawh. Class XII lehkhabute hi vaiin copy 700 theuh chhuttir a ni. Physics lehkhabu hi phek 493 niin Rs. 300 man a ni a, Chemistry hi phek 550 niin Rs. 350 man a ni. Biology hi phek 331 a chhah niin Rs. 250 man a ni a, Mathematics hi phek 329 niin Rs. 250 man a ni thung.
