Sorkar hnathawk hlawh cut tha ti lo

MNF Policy & Programme Board hotute chu vawiin (17.7.2025) hian MNF Office-ah a vawi 4-na atan an ṭhukhawm a, an chairman, MNF Sr. Vice President Dr. R. Lalthangliana'n a kairhuai.

MNF Policy & Programme Board Meeting chuan, 'MNF Sorkar liam tain, Mizoram State Health Care Scheme atana Asian Development Bank (ADB) aṭanga cheng vaibelchhe 1000, soft loan, kum 2021 aṭanga a lo buaipui tawh, kum 2022-a Ministry of Finance kaltlanga a chhâwlchhin (approved) fel tawh, ZPM Sorkar hnuaia bawhzui ṭhat a nih loh vanga a tawp mai hi pawi tak zet,' an ti.

MNF Policy & Programme hotute chuan ZPM Sorkar-in Mizoram Universal Health Care Scheme (MUHCS_ an kalpui dan uluk takin an thlir a, sorkar hnathawk inzawmkhawm pawl, Federation Mizoram Government Employees & Workers (FMGEW) te rem tihna tel loa MUHCS atana an thlatin hlawh cut sak an ni chu tha an ti lo.

Inbiakremna tel loin private hospital-te pawh ZPM Sorkain rate, cashless, sum inhlan chhawn dan system fel fai engmah awm loin an barhlui ringawt mai nia tarlangin, MNF Policy duangtute chuan an dem.

MNF Policy duangtute tarlan danin, Mizoram pawna hospital changtlungte 'rate' ṭha tak offer an nih laiin Mizoram chhunga private hospital leh kohhran damdawi inte pawmpui theih loh system fel lo tak an kalpui a ni. Mipui harsatna tawh nasat zia te hria a, sorkar damdawi in ringawtin mipui mamawhna a phuhruk loh ziate hriain a rang lama inremna siampui tur leh, nu leh pa chan chang taka dawhkan khat hnuaia inremna neihpui turin ZPM Sorkar an phut.