CM nupuiin MHIP Day a hmanpui

Vawiin (7.7.2025) chhun khan Thenzawl Laural Branch MHIP-ten an branch din cham kum 25 na leh MHIP Day, YMA Run Field Vengah an hmang a, Bialtu MLA Lalduhoma, Chief Minister nupui Liansailovi chu khuallian a ni.

Liansailovi hian, Laural Branch MHIP te lawmpuiin an kal zelna turah duhsakna a hlan a, kum 25 chhunga an branch lo kaihruaitute chungah lawmthu a sawi.

Nute chu pasalte kaihhruaina hnuaia awm tur an nih thu sawiin Liansailovi chuan, 'Chhungkuaah thuneitu ber nih kan tum kher tur a ni lo. Chutihrualin, kan pasal fanauten kawng dik lo an zawh tur erawh chu kan dodal ngamin, kawng dik kan kawhhmuh ngam tur a ni thung,' a ti.

Liansailovi chuan sawi chhunzawmin, 'Nuin kan sawi fo chuan kan pasalte pawhin zawm chin an nei nge nge thin. Tin, fate enkawl kawngah thu tha sawi hi thil harsa lutuk a ni lo va, entawntlaka nun hi a pawimawh zawk. Kan fate hian ngawi rengin kan awm dan hi an entawn mai thin,' tiin entawntlaka awm turin MHIP member-te a sawm.