Raltlante chhinchhiah zel an ni

Chin National Army (CNA)-te'n nimin (6.7.2025) a Chin National Defense Force (CNDF) hmunpui Camp Rihli an beih avangin Myanmar atangin raltlan an rawn luh belh zel.

Raltlante hi Saikhumphaiah Mizoram Police leh Vaphai khawtlang hruaitute'n an lo chhinchhiah zel a, chumi hnuah an awmna tur buaipui a ni. Vawiin tlai dar 2 vel thleng khan mipui rawn raltlan 720 chhin chhiah an ni tawh a, anni bakah hian CNDF sipai pariat leh CNDF-in Myanmar sipai an man mi pasarih an tel. Raltlante hi khaw pathum atanga rawn tlanchhia an ni.

CNDF-te'n Chin Defense Force (CDF) hmun Khawmawi, Myanmar leh a chhehvel an beih a, an chhuhsak avanga raltlan pawh an awm belh zel a, Zokhawtharah mi 3,000 chuang an lut tawh.

Myanmar sipai do tura intelkhawm Chinland Council-ah CDF leh CNA hi member an ni a, Myanmar sipai do tura intelkhawm tho Chin Britherhood-ah CNDF hi member an ni thung.