Thawhhona thuthlung inhlan

Chhandamna Kohhran (Salvation Church of India) leh Fundamental Baptist Church of Mizoram (FBCM) ten kohhranhote thawhhona huang an din Joint Committee for Church Unity-a hruaitute Pathian hnena hlanna leh thawhhona thuthlung ziah inhlan tawnna hun nimin (6.7.2025) zan khan Edenthar Chhandamna Kohhran Biak Inah an hmang

He hun hi Joint Committee for Church Unity Chairman Upa Dr. H.Lianzela’n a kaihruai a, Upa Lalnuntluanga Zote, Asembly Chairman (Elect), Fundamental Baptist Church hnen atangin Pathian thuchah ngaihthlak a ni. Rev.Lalnunsiama Khiangte, JCCU Secretary hnen atangin thawhhona report leh hmachhawpte ngaihthlak niin, hruaitu tharte inhmelhriattirna hun a hmang.

Thawhhona thuthlung lo ziah tawh chu Upa Dr.H.Lianzela, President, Chhandamna Kohhran leh Upa Lalnuntluanga Zote, Chairman (Elect), Fundamental Baptist Churchten inhlan tawnin duhsakna chibai an inbuk.

Chhandamna Kohhran leh Fundamental Baptist Church tena thawhhona an neih hi kum khat chhung atan pawhsei leh a ni a, hemi hun chhung hian kohhranhotena rawngbawl hona an neih tur ruahmanna thahnem tak duan a ni. Joint Committee for Church Unity hi kohhran pawl hrang hrangten inpumkhatna tha neia rawngbawlna kalpuina tur huang a ni.

Joint Committee for Unity a hruaitu tharte chu:-

Chairman : Upa Dr.H.Lianzela, President, Chhandamna Kohhran

Vice Chairman : Upa Dr.F.Lalfamkima, Chairman, FBCM

Secretary : Rev.Lalnunsiama Khiangte, Executive Secretary, FBCM

Asst.Secretary : Upa Lalawmpuia Khiangte, Gen.Secretary, Chhandamna Kohhran

Fin.Secretary : Pastor Rommel P.Ngente, AO, Chhandamna Kohhran

Treasurer : Rev.Lalpanliana, Mission & Education Secretary, FBCM