Block Resource Centre Office, Chawngte an khar sak

Chawngte Joint NGO chuan vawiin (7.7.2025) hian Samagra Shiksha, Mizoram hnuaia hnalakah CADC-a ZPM hotute an inrawlh nia an hriat vangin Chawngtea Block Resource Centre (BRC) Office an khar sak.

Chawngte NGO hian Samagra Shiksha hnuai hnalak hi sut phutin ni hnih (July 2 - 3, 2025) chhung Chawngtea zirna in zawng zawng an khar hnuah zirlai test tur leh exam tur an awm avangin sikul khar an ti tawp. Sawrkar atanga an beisei ang hmalakna a awm loh vangin vawiinah BRC Office an khar tir a, an beisei ang thu lawmawm an hmuh hma chu hmalak chhunzawm zel an tum.

Tarlan tawh angin, Chawngte Jt. NGO chuan Samagra Shiksha hnuaia thawktu hna lakah CADC ZPM-te an inrawlh nia ngaiin, Education Minister pawh an hriattir niin an sawi. An sawi danin, hnalak cancel tur leh interview board secretary an sawnna (a hmaa a awmna-a awm leh tura tihna) chu sut turin Education Minister hi an ngen a, an huntiam July 1 chhunga hmalakna a awm loh vangin sikul an khar tir.

Chawngte Joint NGO chuan Samagra Shiksha hnuai Block Resource Centre, Chawngtea thawk tur foundational stage helper, music instructor, sports instructor leh Hindi instructor lakah dik lo taka thil tih a awmin an hria a ni.

An tarlan danin, hna lakah hian hian CADC President leh a thawhpuite chuan la tura an duh list interview board-te an hriattir a ni. Interview board-te hian fair takin lak tum mah se, a thiam lo zual an paih hnuah hna lakah hian CADC ZPM duhte 70% vel an la.

ZPM atanga vauna awm bawhzuina niawm takin interview board secretary chu transfer a ni.