ATL road kawng sample thawn tawh

Aizawl - Thenzawl - Lunglei (ATL) Road zir chiang tura Mizoram Sorkarin a rawih, Central Road Research Institute (CRRI) te'n kawng/lei sample an lakte chu CRRI hmunpuiah thawn a ni tawh.

CRRI atang hian scientist pathum leh technician pahnih rawn kalin, ni 26.6.2025 khan Lunglei an thleng a, Lunglei PWD-te kaihhruaina hnuaiah kawng zirchian hna an thawk. An zirchian tura tih ATL kawnga Kanghmun South leh Pukpui inkara kawngah kawng (lei) sample hmun hrang hrangah an la.

CRRI-in sample an lakte chu vawiin (5.7.2025) hian PWD-ten CRRI hmunpuiah an thawn tawh a, ni 45 chhungin hmuh theih beisei a ni.

Lunglei PWD hotute sawi danin, kawng sample hi CRRI hmunpuiah zirchian a ni ang a, ni 45 chhung kawng siam dan turah rawtna an siam dawn. Rawtna an siam zulzuiin PWD chuan kawng siamna tur atan estimate an siam ang.