NHIDCL-in an la tawh dawn
admin 05-Jul-2025 03:37 PMNimin (4.7.2025) a NHIDCL Mizoram leh NHIDCL Headquarter ,New Delhi-ten meeting an neih bawhzuiin, NH-06 Vairengte leh Sairang inkar, Bilkhawthlir leh Kolasib inkar leh Kawnpui leh Khamrang inkar bik, Mizoram PWD NH-Div III in an enkawl mek chu Mizoram PWD NH Div III hnen atangin NHIDCL in an la dawn.
Kawnpui (km 118)leh Khamrang (km 133) inkar hmun hrang hrangah ni hnih chhungin hna thawh tan a ni ang. Contractor pawh lirtheiten kawngpui him taka an zawh theih nan Bilkhawthlir (km 70) atanga Kolasib (km 95) thlenga hmanrua an hman turte a rang thei ang bera lakhawm tura hriattir niin, kar thar atangin an hnathawktute leh an khawl te nen hna an tan nghal ang.
Tun dinhmunah chuan fur ruahtui tlak lai a nih avangin kawng chhe zual lai thawm that te, a khuar lai lung a hnawh te, tuihawk luankawr tihfai leh leimin thenfai te ngaih pawimawh hmasak a hmalak tan a ni ang.
Black topping hna erawh thal ah thawh tan a ni ang. Felfai taka inhlanchhawn hi Mizoram PWD nena verification leh tul dangte sawihona neih a nih hnuah kalpui a ni ang.
