Dialysis khawl an veng dawn
admin 30-Jun-2025 07:19 PMTukin (30.6.2025) a Mamit NGOCC, All Party, Joint VC, MJA, Mamit thukhawm chuan Mamit District Hospital a hman tur dialysis khawl pali (4) zinga pahnih (2) hmun danga dah tura phurh chuah a ni leh a dang pahnih pawh phurh chhuah leh tura sorkarin ruahmanna a siam chu a ngaithiam lo hle a, he order hi sut ngei turin sorkar an ngen a ni.
An tarlan danin, Mamit District ta tur dialysis khawl hi IOC hnuaiah CSR fund atanga hmuh a ni a, April, 2025 khan Mamitah phurh thlen a ni. Heng zinga pahnih (2) chu June 26, 2025 khan Serchhip District Hospital-a dah turin phurh chhuah a ni tih hriat a ni. A dang la awm chhun pahnih (2) pawh hi Champhai District Hospital-a dah turin sorkarin ruahmanna a siam.
NGOCC, All Party, Joint VC, MJA, Mamit meeting chuan Mamit District a hman tur dialysis khawl Mamit District Hospital a lo thleng vek tawh hmun danga dah tura phurh chhuah a ni leh a la awm chhun pawh lak chhuah leh tum a ni hi pawi a tiin a ngaithiam lo hle. Engti kawng mahin phurh chhuah hi a remti tawh lo a ni. Heng pahnih (2) lakchhuah pawh hi khawl thar danga min thlaksak ngei turin an phut.
Hmun danga dah tura sorkar chhuanlam, a dahna tur hmun a remchang rih lo tih pawh hi NGOCC, All Party, Joint VC, MJA meeting chuan chhuanlam tlingah a ngai lo. District Hospital khum 100 awm theihna tur sak zawh tawh luah mai tura buatsaih mekah hian contractor leh sorkar an la inhlan fel lo tih vanga bun (install) theih loh anga sawi pawh hi chhuanlam tlingah committee chuan a ngai lo. Damdawi in building tharah hian a dahna tur ruahman vat turin sorkar an ngen zawk a ni.
Nunna hi a hlu a in zahsak tur a ni. District danga mite nunna ang thoin Mamit District mipuite nunna hi a hlu. Heng khawlte hi kan nunna pawtseitu, an damna tur a nih avangin hmundanga sawn hi kan remti ngai dawn lo a ni. Mamit District hi Aspirational District a nih angin heng khawlte hi a mamawh hlei hlei an ni.
Chuvangin vawiina NGOCC, All Party, Joint VC, MJA, Mamit thukhawm chuan Mamit District Hospital a dah tur dialysis khawlte hi hmun danga sawn chhuah an remti lo. Mamit District Hospital-ah hian a rang thei ang bera bun (install) tur leh hman a nih thuai theih nana hma la turin sorkar an ngen tak meuh a ni. Heng khawlte hi phurh chhuah a nih loh nan a veng tlat dawn a ni.
