MPCC-in Remna Ni an lawm

MPCC chuan vawiin (30.6.2025) chhun khan an office-ah Remna Ni an lawm a, thusawitu MPCC President Lal Thanzara chuan, 'Kan ramah kum 1966 ah buaina a chhuak a, ram buai kan lo ni ta a ni. Tunah hian thangthar tam tak ram buai hre pha lo an awm a, keini hian thangtharte hnenah kan sawi thar leh a ngai a ni, chuti lo chu politic-ah kalsual theihna a awm dawnin ka hria,' a ti.

Lal Thanzara chuan rambuai vang khan sipaite kut kan tuar a, sipai kutah tualthi te an awm a, hmeichhiate pawngsual an ni a, thenkhatin in leh lo an chan tih sawiin, 'Riltam leh thawpikna, retheihnate kan tuar. Khatia Mizo mipuiin namen lova kan tawrh laia Mizoram mipuite thlamuan tura Mizorama Congress Party a lo piang a ni,' tiin Congress Party-in policy-a remna leh muanna an nei a lawmawm thu a sawi.

Kum 1967 ah Congress a lo piang a, khatih laia Congress President Lal Thanhawla chuan 'Kan pasaltha ramchhuakten sai rawn hawn lo mah se, sakhi, sazuk an rawn hawn anih pawhin nunau hovin kawtchhuahah an lo hmuak anga, a kaptu inah a lu kan tar ang'  tiin remna leh muanna a tlangaupui thin tih sawiin MPCC President chuan, 'Kum 1986 June 25 khan Congress Party leh MNF chuan inremna an ziak a, he inremna vang hian Mizoram Peace Accord a lo piang thei ta a ni. Kum 1976 khan Union Home Secretary SL Khurana leh Pu Laldengate khan inremna an lo ziak tawh a, mahse kha inremna kha a hlawhchham a, a chhan chu Pu Laldenga duh ber Chief Minister nihna an ken theih loh vang a ni. Remna leh muanna nei tur chuan a man pek a ngai. Khatih laia Chief Minister leh Minister te khan an nihna remna leh muanna a awm theih nan an kalsan,' a ti.