4 lane alignment thlak duh lo

Sairang, Sairang Dinthar leh Sairang Sihhmui VC leh NGO chuan thuchhuah siamin, development avanga an tawrh nasat thu tarlangin, '4-lane alignment thlak a nih chuan thlaler ramro, tui tlan tur awm lohnaah kan awm dawn,' an ti.

Sairang, Sairang Sihhmui leh Sairang Dinthar VC leh NGO-te chuan, 'Heng VC area thuma khawtlanga tlawmngai pawl hrang hrangte chuan, development avanga kan tui tlan hnar chhia leh kan lui leh thing hring hrim hrim chereu avanga kan tawrhna hrang hrang, kan tu leh fa, kan tuchhuan lo awm zel turte thlenga kan tawrh zel turte ngun taka kan ngaihtuahin, a hnuaia point pahnih vang hian NH 306 new alignment hi kan duh lo. Alignment hmasa/pangngaiah, chupawh lei lung, thing leh mau, lui lian leh lui te dimdawi taka laih ni se kan duh a ni,' an ti. An tarlante chu : 

1. NABARD loan puka Khamrang to Selesih laihin hun rei tak kan tui tlan hnar a chhilh a, tui kan harsat phah. Sairang pa ho enge maw zat a hmunah kalin, LPS Special report-ah pawh he kawng laihin kan tui tlan a tih chhiat avanga kan lungawi loh thukan au chhuak tawh a ni. NABARD kawng laih vungin kan tui lakna lui a chhilh a, tui kan hmuh chhun pawh a nut vek avangin, tui thianghlim lo kan ei in a ngai. Hemi avang hian Sairang khaw mipuite hian taksa lam harsatna, zun kawng tha lote pawh kan neih phah na sa niin kan hria.

2. Rel kawng laihin kan thing leh mau tam tak a ti chereua, a hmuna cheng nungcha chi hrang hrang a ti chimit. Pi pu atanga kan ei bar hmuhna, kan ramhmul hausakna chhiarsen loh a ti boral vek. Kan luite te an khawro zo va, tuihna tam tak a ti chhe zo tawh. Rel kawng chung lama 4-lane a kal leh chuan Sairang leh a chhevela chengte chu thlaler ramro vai vut hmunah, tui thianghlim tlan tur nei lovin kan awm dawn a ni. Chuvangin, new alignment hi engti zawng mahin kan duh lo a ni.