MNF-in Remna Ni an hmang

MNF chuan vawiin (30.6.2025) hian Mizoram hmun hrang hrangah India Sorkar leh MNF inremna ni champha (Remna Ni) an hmang a, MNF President Zoramthanga chuan Saitualah a hmanpui.

Zoramthanga chuan June 30, 1986 inremna kha thenkhatten 'India leh MNF inremna alawm' tiin an sawi tih sawiin, ' Mah se, a ni lo Mizoram leh India ram inremna a ni a, indona a tel ve lote aiawhin Pu Lalkhama'n a sign a, MNF zawng zawng aiawhin Pu Denga'n, a sign a, Indian aiawhin an sign bawk. India aiawhin MNF aiawhin Mizo mipui aiawhin he remna hi sign a ni,' a ti.

MNF President chuan, 'India leh keini ramhnuai sorkar chhiat vanglai khan inremna siam ta ila, kan tlupherh rang khawp ang. Mah se, kan chak vanglai tak ve ve in remna kan sign a, constitution pawh tidanglam thei khawpin India pawh a chak. Keini ramhnuai sorkar pawh economic leh thildangah pawh kan chak vanglai tak a ni a, sorkar chak lo tan inremna kha sign ngawt chi a ni lo. Khatilai taka kha remruattu maka chuan min nghahtir char char a lo ni a, Remna kan siam ta a ni,' tiin Mizoram UT chu State-ah hlankai a ni a, Article 371G pawh special provision a nih nghal thu a sawi.

Ram neitu nihna leh a behbawmah India Parliament-in thuneihna an nei lo tih sawiin Zoramthanga chuan, 'Mizoram mipui chiahin kan nei thei. He special protection hi India ramah Nagaland nen chiah kan nei a, amaherawh Nagaland chuan kum 1962-ah khawngaih leh duhsak vanga a pek a an pek a ni a, chhuhsak sela a zo der. Keini chu India article 371G hi a lei a kan lei thlap a ni a, chhuhsak ngawt theih kan nilo, tih hi a sawi a. Min laksak dawn chuan kan pek tawh, silai chi hrang hrang leh kan thisen mante kha min pek let ve leh a ngai. He inremna (Peace Accord) hi Zoram mipui zawng zawngin kum 20 chhung kan tawrhna avanga min pek a ni. Min chhuhsak ve ngawt thei lo,' a ti.