PWD Minister-in NHDCIL leh MTA a kawm

Public Works Department (PWD) Minister Vanlalhlana chuan vawiin (30.6.2025) chhun khan a office-ah NH-6 (Vairengte-Sairang) kawng siamthat leh enkawl chungchangah National Highways & Infrastructure Development Corporation Limited (NHIDCL) hotute leh Mizoram Tipper Association (MTA), Kolasib Sub-Headquarters aiawhte a kawm.

PWD Minister sawi danin, Vairengte leh Sairang inkar kawng chu kum 2020 khan Ministry of Road Transport & Highways (MoRTH)-in NHIDCL kutah a hlan tawh. Hetih hunlaia NHIDCL-in a lak theih loh chhan PWD hnathawh laklawh lai chu nikumah thawh zawh niin, NHIDCL kutah a awm tawh.

National Highway chu MoRTH ta a ni a,  kawng siam leh enkawl zuina senso atana sum pawh MoRTH-in a tum thin a, a enkawl tur pawhin BRO/PWD/NHIDCL a ruat thin a ni.

NHIDCL-in hma an lak zui mai loh avangin Mizoram Sawrkar chuan lirtheite an tlan hram hram theih nan tiin helai kawng enkawl nan hian nikum financial year-ah cheng nuai 200, kuminah cheng nuai 111.74 a seng tawh.

He hunah hian pawimawh leh tul hrang hrangte sawiho niin, he kawngpui hi NHIDCL hnuaia awm a nih thu leh MPWD in hemi atan hian Central atangin sum a hmuh theih tawh loh thu tarlan a ni.

NHIDCL kawng enkawl lai siam mekna atana sawrkar a insen lai hian, a that theih loh avangin MTA-te an hnatlang a ni. Resource-in a daih tawh loh avanga MPWD hnena boulder trip 50 ngaihtuahsak tura an dilna chu PWD Minister chuan a ngaihtuahsak tur thu a sawi.