Chhungkaw 2,92,849 in MUHCS an zawm tawh

Vawiin (30.6.2025) chhun khan Health Minister Lalrinpuii chuan Mizoram Universal Health Care Scheme (MUHCS) zawm thar private hospital pali - Nazareth Hospital, Chaltlang; Nazareth Hospital, Ramhlun North, Redeem Hospital, College Veng leh Kidney 360° Superspeciality & Diagnostic Centre, Bazar Bungkawn a tlawh.

Lalrinpuii chuan mipui hmakhua ngaia private hospital pathum leh Kidney 360° ten ke an rawn pen chhuak chu lawmawm a tih thu leh, vawiin nia MUHCS zawm remchang ve rih lote pawh sawrkar chuan a nghah reng thu leh engtiklai pawha sawrkar a inhawn reng thu a sawi.

Health Minister chuan, “Sorkarin mi zawng zawng huapzo health care cashless-a a kalpui chu nasa zawka mipui tana rawngbawlna a ni a. Hetianga nasa zawka mipui rawngbawlna MUHCS kaltlanga a inhawng hi a lawmawm takzet a ni. MUHCS hi mi zawng zawng tana duan a ni a, hemi tihlawhtling tur hian sawrkar hospital hrang hrangte theihtawpa thuam that chhoh mek a ni. Heti chung hian sawrkar hospital chauh chuan mipui min dawlzawh loh avangin provate hospital-te an pawimawh em em a, mipui rawngbawlna a ni tih hre chung a, MUHCS rawn zawm zel turin private hospital te ka sawm nawn leh a ni,” a ti.

Health Minister sawi danin, vawiin thleng hian hian MUHCS zawmtu (beneficiaries) chhungkaw 2,92,849 an awm mek. Chungte chu - ABPMJAY - 2,19,002, sawrkar hnathawk - 55,470, pensioner - 9310 leh mipui (general beneficiary) - 9069 an ni.

Damlo bill kartin pek chhuah niin, ni 24.6.2025 thleng khan mi 12,917 hnenah ₹15,12,17,890 pek chhuah a ni tawh.