CM leh MEA Jt. Secretary inkawm

Vawiin (26.6.2025) tlai khan Chief Minister Lalduhoma chuan a office-ah Mizorama lo zin mek Ministry of External Affairs (MEA), Protector General of Emigrants Jt. Secretary Surinder Bhagat a kawm. CM chuan raltlan dan bawhchhiat chingte lakah khauh taka hma an lak dawn thu a sawi.

CM hian MEA Jt. Secretary hi placement agency lem, ram pawna dan loa hnathawk tura thawn chhuak thinte chungchang leh chung agency-te license tihtawp a nih tak dante, an prosecution sanction pawh Protector General of Emigrants lama dil mek a nih thute a sawipui. 

China rama Mizo nula pakhat leh tlangval pakhat, MBBS zir tura kal, harsatna han tawk tate chungchang leh Myanmar atanga raltlan lolutte biometric-a chhinchhiahna tur kalpui tan a nih dante bakah Taiwan rama India Sawrkarin thalai hnathawk tur thawn a tum chungchangte pawh an sawi dun.

Myanmar raltlante chungchangah hian Chief Minister chuan, 'Tha taka rawn tlan, thuawih taka awm an awm a. An ram buai chhuanlama ramri kana tei kual thin, kan ram dan rawn bawhchhiat ching pawh an awm. Heng dan bawhchhiat chingte lakah hian khauh takin hma kan la dawn. ramri rawn kan te Myanmar sawrkar ID hi an cham chhung chu laksak/kawlsak (deposit) zel mai zel thain kan hria,' a ti.

Surinder Bhagat chuan, 'Placement agency lemten India mi ram pawnah an thawn chhuaka, chung mite hmang chuan India mite rawn bum (scam) an tum leh a, a buaithlak thin hle. Ram pawna hnathawh tum kan thalaite an fimkhur a ngai hle,' tiin Taiwan rama hnathawk tur lakna hi Sawrkar Laipuiin a kalpui thuai a rin thu a sawi.