Hnatlangin kawng chhe lai siam

Mizoram Tipper Association (MTP), District Headquarter, Kolasib chuan nimin (26.6.2025) khan Kawnpui leh Sairang inkar NH-306 & 06 kawngpui chhe zual lai siamthat hnatlang an ko a, Sub Hqrs YMA, Kolasib thurel angin Kolasib Town chhunga Branch YMA leh Awithangpa Group YMA hnuaia branch-ten hnatlang an thawhpui a ni.

Kawng khuar hnawh nan MTP chuan lung phur 28 an lei a; chawhnu lamah chuan lung in a daih loh avangin hna a khaihlak deuh a; lung lei tur an hmuh chuan karleh Thawhlehni thleng hnatlan an tum a ni.

Nimin khan Kawnpui to Tuitun Lei thla inkar kawng chhe zual lai hnawh a ni a, Tuitun leh Khamrang inkarah boulder chhawp lawk nghal a. Hei hi vawiin hian hnatlang a hnawh chhunzawm leh a ni ang.

Buichali to Sairang hi tun dinhmunah lung Hyva trip 20 vel khuar chhe zual lai hnawh nan mamawh a la ni. Hyva trip 3 hi kawng siam nan chhawp tawh niin, lung chhawp sa hi vawiin hian Sairang VC kaihhruaina hnuaiah khawtlang mipui ten hnatlang in an thawk chhunzawm leh ang.

Kawnpui to Sairang inkar kawng chhia te hi hnawh zawh a nih hma chuan lirthei eng chi mah kal tlang lui lo turin MTP chhan an ngen. Nimin tlai thleng khan lirthei tangkhang hi Aizawl atanga Silchar lam pan tur lirthei 400 a awm tawh a, Kawnpui khawchhung a lirthei ritphur ding hi 60 vel an ni tawh.

Rengtekawn leh Lailapur lamah lirthei ritphur thahnem tang an tangkhang.

Tlawmngai-a hnatlang te bakah hian Mizoram PWD chuan nitin hna an thawk a; JCB leh Road Roller nen vil reng mahse kawng chhia a thui tham tawh a; an vil seng lo. Hei vang hian Lirthei kal dan a buai a; police-ten chhun zan zawmin an vil zui.

Mizoram PWD chuan he kawng hi NHIDCL kuta awm tawh a ni a; Ministry of Road Transport and Highways chuan kawng siam na tur pawisa hi Mizoram PWD hnenah a pe thei tawh lo a; NHIDCL kutah eng kim hlan fel a ni tawh an ti. Mah se, state chhung kawngpui pawimawh ber anih avangin PWD chuan theih tawp in a enkawl zel rih niin an sawi.